Am Samstigmorge träffed sich d’Seebuebelüt
Mä goht zämä go reise hüt
Am 7ab 7i fahred mir los in Altnau
Do weiss dä Hans dä Wäg no ganz genau
zMüllheim chunnt dä Heiri und d’Ruth no mit
jetz hoffi dass es e schös Wochäend git
im grosse Car alli locker verteilt hocked
git kei Problem falls öper zmol ämol bocket
jetz wird gfahre bis uf Hergiswil
döt chönt mä glasigs poschte ganz viel
lieber wird doch Kafi trunke
und mir vom Glasturm gwunke
am 10i isch d’Witerfahrt agseit
dä Hans isch us allne Wolke gheit

jetz isches doch immer anderst gsi
und diä Stross mitem Car zfahre gsi
2x müemer chere, aber das chan er guet
Das git au üs hinä inä guetä Muet
Denn probiered mirs glich ächli mit singe
Und tüend so, Zyt schnell umäbringe
Nobel isch tischet im Hotel Dorint
Und s’Personal serviert und rumt ab im Sprint
En Marsch zum Bähnli das haltet fit
Do möged au alli wunderbar mit
Nochere schöne Fahrt durab zum See
Chamä gli au s’Berneroberlandschiff gseh
Mit dem fahred mir zerst ächli ersti Klass
Doch dä Kontrolleur verderbt üs bald dä Spass
Als üsen Bodygard got dä Gröscht verus
Er chunt halt do am Beschte drus
Die einte gnüsseds dusse im Wind
Die andere finded es Plätzli underem Spiegel gschwind
Mitem Car nomol es Fährtli direkt uf Spiez
Zumä schönä Hotel , mä gsiet’s

Wasser häts au um üs um
En Gump dri wär jetz nöd dumm
Die einte wogets aber send froh
Wo sie wieder händ chönä usä cho
Anderi gönd uf dä Turm oder go laufe
Ich ha welä go Karte chaufe
Denn diä, wo nöd händ chönä mitcho
Söled doch wenigstens es Grüessli öbercho
Zum Apero lad dä Hannes schriftlich i
Das isch aber en komische Apero gsi för mi
Dä Senjor serviert mit Bravur
Wenn mä dem zuälueget stuunät mä nur
Nochem z’Nacht?  Wo söläd mir jetz no hi
Das isch denn die grosse Frage gsi
Mir spazieräd ächli döt und do
Händ schlussendlich dä Wäg zum Schloss uä gno
Hinä wieder abä und ganz gschwind
Dä erst nomol es Spüntli find
Döt wird nochli trunke und chli plauderett
Bis die meischte denn halt gönd is Bett

Zum z’Morge träffed sich wieder alli froh
Und verzeläd vo dä Nacht und so
Dä Zmorge wird gnosse jedä wieners mag
So gits sicher au hüt en guete Tag
Dä Chef wünscht no e Lied bevor mir gönd
Also probiered mir’s; au wenn mir 2 Fraue nöd so wönd
Aber i glaub so schlimm isches nöd gsi
Dä Chef isch amel zfredä gsi
Jetz gohts witer Richtig Simmetal
Dä Markus luegt wos dorä goht dasmol
Au do müemer wieder eimol chere
Aber dä Hans mag sich do scho gwehre
Dur’s Simmetal verzellt dä Kurt sehr gärn
Sini Auge lüchted wienen Stern
Do hät er verbrocht sini Jugendzyt
D’Erinnerige nimmt mä äbä s’Läbä lang mit
Er weiss viel! S’isch intressant
Mä merkt er isch do sehr bekannt
Uf Bäderalp laufed mir vom Jaunpass
Das hät gmacht allne Spass

Do werded mir bedient mit feine Sache
wo sie fascht alles do obe tüend mache
Au Merengge wies dein Herz begehrt
Do isch s’abe laufe denn sicher öpis wert
E paar Manne gönd no in Stall
Aber jetz stinked ihr! im Fall
Mir probiered nomol eis singe
Dass mir au ihne öpis chönd bringe
Es Fotoshooting stoht au no ufem Plan
Damit mä denn au im Internet luege chan
En wunderschönä Usflug! Danke Kurt
Mit dir gömmer gärn wieder ämol furt
Verabschiede tömmer üs mit Dank
Und scho bald semmer verschwunde henderm Rank
Dä Hannes git mir öpis in Rucksack, jetz isch er vollä
I hoff es git hüt kei Rucksackkontrollä
Nomol durs Simmetal zrugg isch wunderschö gsi
Viellicht chämäd mir wiederämol verbi
Stille isches im Car während em Fahre
S’Ziel isch denn Wange a dä Aare

Im Hotel al Ponte gits Salotig’s no
Bis mir uf dä räschtlich Hamwäg tönd go
Jetz isch das Wochäend scho bald verbi
Ich glaub mä törf sägä es isch schöö gsi
Es hät üs gfalle mir säged Dank
Für jedä guet gfahre Rank
Tschüss mitenand und bis am Zischtig
Hoffentlich alli gsond und niemert chischtig